ප්‍රජා සේවා හා සමාජ සුභ සාධනය

අම්බලන්ගොඩ නගර සභා මහජන පුස්තකාලය

හැදින්වීම

1939 දෙසැම්බර් මස 16 වන දිනපැවති නාගරික දිස්ත්‍රික් මාසික රැස්වීමේදී නිදහස් පුස්තකාලයක් සහ කියවීම් ශාලාවක් ආරම්භ කළ යුත යැයි ද ඒ සඳහා රුපියල් දහසක් නො ඉක්මවන මුදලක් වැය කළ යුතුය යනුවෙන් නගර සභික පී.එච්. චාර්ලිස් ද සිල්වා මහතා විසින් සිදු කරන ලද යෝජනාව එවකට සභාපති වූ නීතිඥ ටී.සී.පී. ප්‍රනාන්දු මහතා විසින් ස්ථීර් කරන ලදි. 1940 ජනවාරි 13 වන දින අම්බලන්ගොඩ නගර සභාවක් වී පැවති පළමු මාසික රැස්වීමේදී නිදහස් කියවීමේ ශාලාව සහ ආශ්‍රිත පුස්තකාලය ආරම්භ කිරීම සඳහා ක්‍රියා කිරීමට කමිටුවක් පත් කරන ලදි. එහි සභාපති ටී.සී.පී. ප්‍රනාන්දු මහතා, එන්. එච්. ද සිල්වා මහතා, සෞඛ්‍ය වෛද්‍ය නිළධාරී තුමා පී.එච්. චාර්ලිස් ද සිල්වා මහතා, ඩී. ටී. විජේරත්න මහතා, රිචඩ් ද වාස් ගුණවර්ධන මහතා, කේ.එස. සුමනසූරිය මහතා, අයත් වූහ. ඔවුන්ගේ නිර්දේශ අනුව පුස්තකාලය 1940 පෙබරවාරි 01 දින පටබැඳිමුල්ල ප්‍රදේශයේ ආරම්භ කෙරුණි. පළමු පුස්තකාලයාධිපති වශයෙන් එල්.යූ. පීරිස් මහතා පත් වූ අතර ඔහුට රුපියල් 300.00ක මාසික දීමනාවක් ද ඊට අමත අමතරව 15% ක කොමිසමක් ද ගෙවීමට තීරණය වුණි.

මෙම පුස්තකාලය 1961 දී එතෙක් පැවති ස්ථානයෙන් ඉවත් කෙරුණි. අනතුරුව එය අම්බලන්ගොඩ විදුලිබලාගාරය පැවති ගොඩනැගිල්ලට ගෙන යන ලදි. 1978 වන තුරු පුස්තකාලය පැවතියේ එම ගොඩනැගිල්ල තුළය. අම්බලන්ගොඩ කාර්යාල පරිශ්‍රයේ පිහිටා ඇති වර්ථමාන පුස්තකාල ගොඩනැගිල්ලේ මුල්ගල 1976 දී එවකට පළාත් පාලන කොමසාරිස්ව සිටි ඩබ්. ඊ. වී. ඇස්.ද අල්විස් මහතා විසින් තබන ලද අතර 1978 පෙබරවාරි මස 20 වන දින ගරු. අග්‍රාමාත්‍ය (පළාත් පාලන නිවාස හා ඉදිකිරීම් කටයුතු පිළිබඳ අමාත්‍යය ) ආර්. ප්‍රේමදාස මැතිදුන් විසින් විවෘත කරන ලදි. ඉතා විශාල පරාසයකින් යුත් ග්‍රන්ථ සඟරා සහ දිනපතා පුවත්පත් පරිශීලන‍යට පහසුකම් සලසා දෙමින් ප්‍රදේශයේ ජනතාවගේ දැනුම සංවර්ධනය තුළින් තිරසර සංවර්ධනයට කැප වී සිටින අප පුස්තකාලය වර්තමානය වන විට මහ අම්බලන්ගොඩ, පෝරඹ, පොල්වත්ත, ඕකන්ද, කෙරමිණිය, හිරේවත්ත සහ හෙප්පුමුල්ල යන ශාඛා පුස්තකාල හතකින් සමන්විත වේ.